Van vrouw Tabak

(slikken) Lekk're lolly jong!
Kregen van vrouw Tabak.
Die jonge rooie kat van heur die zat ies weer op ’t dak.
Ken ej vrouw Tabak? Wij kinder alemaol wal:

Hela! Maak daj vot komt, hier niet speulen met die bal!

Wilt U kinderzegels?

Nee, die dinger heb ik al.

Dag mevrouw, ik loop met lootjes, veur het goeie doel.

Nee heur, zukse lootjes heb ik al een hieleboel.
Die jeugd van tegenwoordig is ok altied maar op tjak.
Nee, ej klopt dit aole mèens gien centen oet de zak!

Dat is dus vrouw Tabak.

Maar gister was ‘t toch wal wat sneu. Zie stun daor veur heur hoes
En aal maar loeren hen boven en maar roepen van “Poes, poes poes!
Heur kat zat in de dakgeut, ej kunnen net zien oorties zien.
Hoe of dat dier daor kommen was, dat wus vanzölf gienien.
Toen luup daor Jansie Reinders en vrouw Tabak die ruup:

Hela jongie, kom ies, ie hebt vast wal zin an snuup.
Klim jij eens tegen die piep umhoog en haal dat kattien op,
Dan krieg jij, aj beneden bint een dikke rolle drop.

Zodoende luup oes Jansie even later stoer bij't pad
Als redder van een kattie, en met beide mondhoeken zwart..
Toen dacht ik: Ok al krieg ik ‘t met mien olders an de stok,
Wat dat kleine Jansie kan, nou, dat kan ik ok!
Dus klum ik dizze mörgen al hiel vrog oet mien bed,
Heb ‘t kleine kattien vangen en weer in de dakgeut zet.
En toen een uurtien later vrouw Tabak op boeten luup
was ik de eerste die zij zag toen zie heur kattien ruup.
Zodoende heb ik nou zun fijne lolly in de haand.
Kregen van vrouw Tabak!
Ja dat mag wal in de kraant!

Licentievrij plaatje via Open Clipart