't is toch wat

1

't Is toch wat met Pieter Bas,

hie is de kleinste van de klas.

Hie wol dat e wat groter was.

Ik bin te klein, zeg Pieter Bas.

'k Grui niet genog, dat zul wal moeten.

Alles is klein, haandties en mien voeten.

'k Kan niet springen over een waterplas,

wat wol'k geern da'k groter was.

'k Kan niet bij de hoogste boekenplaank,

oh, hadde'k maor een toverdraank.

'k Kiek overal en tegen iederiene op,

was'k maor groter, net zo groot as Rob.

 

2

Het is toch wat met Rob van der Stang,

hie is zo lang, hie is zo lang.

Hie is de langste van de klas

en wol dat e wat kleiner was.

'k Grui te hard, ik schaom mij dood,

Was'k maor niet zo griezelachtig groot.

Ze scheldt mij uut veur lang stuk holt

en vraogt mij is 't daorboven kold.

Ik wol toch da'k wat kleiner was,

maor niet zo klein as Pieter Bas.

Ik mut aaid kieken naor benee,

was'k maor net zo as André.

 

3

Het is toch wat met Andre Ket.

Wat is daor met, wat is daor met?

Die jongen is toch kogelrond,

hie is te vet, 't is niet gezond.

Andre zit daor hielmaol niet met,

Hie et geern frities en kroket.

Hie zeg dan: ie mut 't zo zien,

'k doe absoluut niet an de lien.

't lenige waor ik arg um treur

is mien haor, 'k hol niet van de kleur,

'k Ben liever blond zoas die Pieter Bas.

Hie is de blondste van de klas.

Hie is te klein, dat is wel waor

maor hie hef toch het mooiste haor.

 

4

Wat een gedoe, gienien is tevreden

Da's nou zo en ok in 't verleden.

Nim nou dat sproetieskoppie Tobias,

hie hef wal dure schoenen van Adidas.

Niels en Pieter Bas voetbalt veule beter

dan Christiaan, Jordi en Jan Peter.

Met de wichter is het 't zölfde verhaol.

Die zeurt nog meer dan doezendmaol.

Maor d'echt aordigste van 't hiele stel,

dat bin ie zölf toch misschien wel?

 

Schriefster: Beate Plenter