Dikke problemen

O, ik kan d'r wal van dreumen:

Stamppot andievie, 'n speklap d'r bij,

'n Dik stuk worst, gezolten spekkies,

Dat is ja 't lekkerste eten veur mij.

Maor 'k kan 't wal vergeten, 't is maor daj 't weet:

Mien moe is te dik, dus wij bint op dieet.

 

Gebakken erpel met 'n karbonade...!

Mien moe zeg: "Da's veuls te vet!"

Vrogger aten wij spèkpannekoeken,

En smangs patat... met 'n kroket.

Maor now niet meer, 't is maor daj 't weet:

Mien moe is te dik, dus wij bint op dieet.

 

A'k thuus kom oet schoel stiet de thee al klaor, 

Ja, thee met 't blote gat! 

Gien suker, gien koekien, of 'n lekker stuk taort, 

Kale thee, en dan hej 't wal had. 

Gien vet, gien zuut, 't is maor daj 't weet:

Mien moe is te dik, dus wij bint op dieet.

 

O, 'k heb protesteerd en van alles prebeerd;  

Ik bin ja zo mager as wat...!  

Mien moe zee allent: "Ach maok je niet dik!" 

Ja...., a'k de kaans maor had!!!

 

schriefster: Hermien Boesjes

https://picjumbo.com/download/?d=HNCK3862.jpg&n=enjoying-a-tasty-burger